Ijtimoiy tarmoqlarda Qumqo‘rg‘on tumani veterinariya va chorvachilikni rivojlantirish bo‘limida 90 tup tut daraxti tagi bilan kesib tashlangani haqida xabar tarqaldi. Surxondaryo viloyat ekologiya, atrof-muhitni muhofaza qilish va iqlim o‘zgarishi boshqarmasi holatni o‘rganib, tabiat kushandasini aniqladi.
O‘suvchanligini yo‘qotmagan tutlarni ilgari Qumqo‘rg‘on tumani veterinariya va chorvachilikni rivojlantirish bo‘limida rahbar bo‘lib ishlagan Quvondiq Tolibov (ism-sharif o‘zgartirildi) joriy yilning 23 noyabrida ma’muriy binoning orqa tomonida o‘sib turgan 89 dona tut va bir tup gilos daraxtini tag qismidan noqonuniy kesgani ma’lum bo‘ldi.
Viloyat ekologiya, atrof-muhitni muhofaza qilish va iqlim o‘zgarishi boshqarmasi ma’lum qilishicha, o‘zboshimchalik bilan sodir etilgan bu harakat O‘zbekiston Respublikasining “O‘simlik dunyosini muhofaza qilish va undan foydalanish to‘g‘risida”gi qonuni 37-moddasi talablarini buzib, tabiatga 50 million 625 ming so‘m zarar yetkazgan.
Mazkur holat yuzasidan Qumqo‘rg‘on tumani Qorsoqli mahallasida yashaydigan tabiat kushandasiga O‘zbekiston Respublikasi Ma’muriy javobgarlik to‘g‘risidagi kodeksning 79-moddasi 1-qismiga muvofiq ma’muriy bayonnoma rasmiylashtirilib, 9 million 375 ming so‘m jarima belgilandi. Shuningdek, kesilgan har bir tup daraxt uchun 100 tupdan daraxt ko‘chatini ekib, uni uch yil davomida parvarishlab berish majburiyati ham yuklatildi.
Qattiq sovuq qachon chekinishi ma’lum qilindi
O‘zbekistonga yana qorli sovuq havo kirib kelmoqda
Propan narxi tushishda davom etmoqda, benzin esa....
