Seutada migrantlar oqimidan so‘ng jinsiy zo‘ravonlik bilan bog‘liq 23 ta holat qayd etildi. Jabrlanganlar orasida voyaga yetmaganlar ham bor

Ushbu holatlardan biri bir necha kun oldin sodir bo‘lgan. Ayblov tomonining ma’lum qilishicha, marokashlik migrant Ispaniyaning Seuta eksklavida ko‘chada 16 yoshli qizga nisbatan jinsiy tajovuz qilgan. Gumonlanuvchi Marokash chegarasi yaqinida qo‘lga olingan. Tergov ma’lumotlariga ko‘ra, u o‘z vataniga qaytib ketmoqchi bo‘lgan.

7 sentyabr kuni sud migrantni tergov davrida qamoqda saqlash haqida qaror chiqardi. Erkak o‘ziga qo‘yilayotgan ayblovlarni rad etmoqda.

16 yoshli qiz bilan bog‘liq holat yagona emas. Ispaniya prokuraturasi ma’lumotlariga ko‘ra, iyul oyi oxirida migrantlar oqimi boshlanganidan buyon jinsiy xarakterdagi jinoyatlar bo‘yicha jami 23 ta ariza qayd etilgan. Xabarlarga ko‘ra, jabrlanganlarning to‘qqiz nafari voyaga yetmaganlar. Aniqlangan gumonlanuvchilar orasida turli mamlakatlar fuqarolari, jumladan, uch nafar ispaniyalik ham bor. Tergov ishlari davom etmoqda. Barcha ayblanuvchilar aybi sudda isbotlangunga qadar aybsiz hisoblanadi.

Ma’lum bo‘lgan holatlar orasida 17 yoshli marokashlik o‘smirga oid ish ham bor. U 10 va 11 yoshli uch nafar qizga nisbatan jinsiy zo‘ravonlik sodir etganlikda ayblanmoqda. OAV xabarlariga ko‘ra, qizlar ham, gumonlanuvchi ham iyul oyi oxirida migrantlar oqimi vaqtida Shimoliy Afrikadan Seutaga kelgan va hamrohsiz voyaga yetmaganlar uchun mo‘ljallangan «Piniyers» qabul markaziga joylashtirilgan.

ABC gazetasi ma’lumotiga ko‘ra, taxmin qilingan tajovuzlar aynan shu markazda sodir bo‘lgan. Shundan so‘ng, Ispaniya OAVlari xabar berishicha, gumonlanuvchi markazning boshqa yashovchilari tomonidan kaltaklangan.

Hozirda ishni Ispaniya polisiyasi tergov qilmoqda. Jabrlanganlar soni ko‘proq bo‘lishi mumkinligi taxmin qilinmoqda. Shu sababli markazdagi boshqa voyaga yetmaganlar ham so‘roq qilinmoqda.

Ispaniyaliklar hukumatning migrasiya siyosatiga qarshi namoyish o‘tkazmoqda

Bunday hodisalar Seutadagi allaqachon tarang bo‘lgan vaziyatni yanada keskinlashtirmoqda.

2 sentyabr kuni Ispaniyaning ko‘plab shaharlarida o‘n minglab odamlar hukumatning migrasiya inqiroziga nisbatan siyosatiga qarshi namoyish o‘tkazdi. Namoyishchilar migrantlarni qaytarish va chegara muhofazasini kuchaytirishni talab qildi.

Shuningdek, ular bosh vazir Pedro Sanchesni tanqid qildi, ayrim namoyishchilar esa uni iste’foga chiqishga chaqirdi.