Ruslar paradining o‘tkazilishi so‘roq ostida qolganidan xavotirda, bu o‘rinli xavotir — Ukraina prezidenti

Vladimir Zelenskiy seshanba kungi kechki videomurojaatida Rossiya urushni to‘liq to‘xtatishi kerakligini yana bir bor ta’kidladi. Putin tomonidan G‘alaba kuni munosabati bilan e’lon qilingan sulhga izoh berar ekan, Zelenskiy istehzo bilan Rossiya rahbariyati Moskvadagi parad borasida xavotirda ekanini bildirdi.

"AQSh bilan yangi sanksiyalar bo‘yicha muloqotga tayyorgarlik ko‘ryapmiz, aynan Rossiyani diplomatik yo‘lga majburlaydigan eng og‘riqli nuqtalarni tanlayapmiz. Ular urushni tugatish bo‘yicha aniq qadamlar tashlashi kerak, biz esa shartlarsiz va to‘liq o‘t ochishni to‘xtatish birinchi qadam bo‘lishi lozim, deb hisoblaymiz. Rossiya buni amalga oshirishi kerak. Hozir ular paradining tinch o‘tkazilishi so‘roq ostida qolganidan xavotirda. Bu o‘rinli va to‘g‘ri xavotir. Ammo ular bu urush hanuz davom etayotganidan xavotirda bo‘lishi kerak", — dedi Ukraina yetakchisi.