Rossiyada migrantlar uchun qo‘shimcha davlat boji joriy etildi

Rossiya prezidenti Vladimir Putin migrantlar uchun qo‘shimcha davlat boji joriy etish va amaldagilar sonini oshirish to‘g‘risidagi qonunni imzoladi.

RG.ru sayti xabar berishicha, shu jumladan, chet el fuqarosini turgan joyi bo‘yicha ro‘yxatdan o‘tkazish uchun davlat bojini joriy etish, shuningdek, chet el fuqarosini yashash joyi bo‘yicha ro‘yxatga olish uchun davlat boji miqdorini oshirish rejalashtirilmoqda.

Avvalroq Davlat Dumasi raisi Vyacheslav Volodin bu kabi yangiliklar byudjetga mablag‘lar oqimini oshirishi, shuningdek, migrantlar ustidan nazoratni kuchaytirishi haqida aytgandi. Ularning haqiqiy yashash joylarini aniqlash osonroq bo‘ladi, bu esa o‘z navbatida noqonuniy migrasiya darajasini pasaytirishga yordam beradi, deya tushuntirdi ma’ruzachi.

Davlat boji quyidagi miqdorda to‘lanadi:

- chet el fuqarosini Rossiya Federasiyasida yashash joyi bo‘yicha ro‘yxatdan o‘tkazish uchun - 1000 rubl miqdorida (hozirda - 420 rubl;

- chet el fuqarosini yashash joyida ro‘yxatdan o‘tkazish uchun - 500 rubl ;

- mamlakatda vaqtincha bo‘lish muddatini uzaytirish uchun - 1000 rubl;

- chet ellik ishchilarni yollash uchun dublikat ruxsatnomalar berganlik, tegishli ruxsatnomalardagi ma’lumotlarga o‘zgartirishlar kiritganlik uchun – 2100 rubl;

- migrantga berilgan ishlash ruxsatnomasining amal qilish muddatini uzaytirish uchun - 4200 rubl;

- bunday hujjatning dublikatini berish va o‘zgartirishlar kiritish uchun - 2100 rubl;

- chet el fuqarosiga patent berish yoki qayta rasmiylashtirish uchun - 4200 rubl;

- patentning dublikati va o‘zgartirishlari uchun - 2100 rubl.

Shu bilan birga, chet el fuqarolarini ro‘yxatga olishning qo‘shimcha mexanizmlarini joriy etish bo‘yicha eksperiment ishtirokchisi bo‘lgan shaxslarga chet el fuqarosini turgan joyida ro‘yxatdan o‘tkazish uchun yig‘im qo‘llanilmaydi.

Rossiya Federasiyasiga viza talab qiladigan tarzda kelgan chet el fuqarosining vaqtincha bo‘lish muddatini uzaytirish uchun davlat boji to‘lanmaydi.

Qonun 2025 yil 1 sentyabrdan kuchga kiradi, lekin rasmiy e’lon qilingan kundan boshlab bir oydan kechiktirmay.

Yangi davlat bojlari amaldagilarni to‘ldiradi. Vyacheslav Volodin avvalroq eslatganidek, Rossiyaga amaldagi qoidalarga muvofiq ishlash uchun vizasiz mamlakatlardan kelgan fuqarolar patent olishlari kerak, uning narxi oyiga o‘rtacha 8-10 ming rublni tashkil qiladi. Shu bilan birga, viza olgan mamlakatlardan kelgan migrantlar ishlash uchun ruxsatnoma oladilar.

Daromad raqamli axborot tizimlarini rivojlantirish va migrasiya xizmati xodimlarining malakasini oshirishga yo‘naltirilishi mumkin.