Rossiya yangi keng ko‘lamli safarbarlikka tayyorgarlik ko‘rmoqdami?

Ukraina razvedkasi ma’lumotlariga ko‘ra, Moskva yil oxirigacha bir necha yuz ming kishini safarbar qilishni va 2027 yilda ham harbiy xizmatga jalb qilishni davom ettirishni rejalashtirmoqda.

Ukraina prezidenti Vladimir Zelenskiy Ukraina razvedkasi Rossiya yangi keng ko‘lamli safarbarlikka tayyorgarlik ko‘rayotgani haqida ma’lumotga ega ekanini bildirdi. Uning aytishicha, Moskva bu safarbarlikni kuzda o‘tkazishni rejalashtirmoqda.

Zelenskiy Ukraina Mudofaa vazirligi Bosh razvedka boshqarmasi rahbari Oleg Ivashchenkoning hisobotini tinglaganini ma’lum qildi. Uning ta’kidlashicha, razvedkada Rossiyaning ichki hujjatlari mavjud bo‘lib, ular Moskva kuzda, parlament saylovlari o‘tkazilganidan keyin safarbarlik boshlashga tayyorlanayotganini ko‘rsatadi.

Zelenskiyning aytishicha, saylovlardan so‘ng Rossiya hukumati 2026 yil oxirigacha bir necha yuz ming kishini tezkor ravishda safarbar qilishni, kelasi yil esa shunga yaqin miqdorda yana harbiy xizmatchilarni jalb etishni rejalashtirmoqda.

Ukraina prezidenti bu Rossiya qurolli kuchlarini shartnoma asosida harbiy xizmatchilar bilan to‘ldirish jarayoni davom etayotgan bir paytda amalga oshirilishini ta’kidladi.

Zelenskiy, shuningdek, Kiyev Rossiyaning ushbu rejalariga qarshi chora ko‘rishga tayyorlanayotganini bildirdi.

«Biz o‘z faol harakatlarimizga, Rossiyaning bunday rejalarni amalga oshirishini imkon qadar qiyinlashtirishga tayyorgarlik ko‘ryapmiz», — dedi u.

Hozircha Ukraina tomonining Rossiya yangi safarbarlik o‘tkazish rejalari haqidagi bayonotlari mustaqil manbalar tomonidan tasdiqlanmagan.