Rossiya urush va terrorni to‘xtatmoqchi emasligini ko‘rsatmoqda — Ukraina prezidenti

Vladimir Zelenskiy Rossiya harbiylari 4 iyulga o‘tar kechasi "namoyishkorona tarzda eng yirik havo hujumlaridanbiri" amalga oshirilganini aytdi.

Ukraina prezidentining ma’lum qilishicha, Rossiya hujumda 550 ta dron va raketadan foydalangan.

"Tunda bizning shahar va hududlarimizda havo hujumi xavfidan ogohlantirish aynan Tramp va Putin o‘rtasidagi telefon suhbati haqida ommaviy axborot vositalarida xabar berilishi bilan deyarli bir vaqtda boshlandi. Rossiya yana bir bor urush va terrorni to‘xtatmoqchi emasligini ko‘rsatmoqda", — deya ta’kidladi Zelenskiy.

Uning so‘zlariga ko‘ra, Rossiya zarbalarining asosiy nishoni mamlakat poytaxti Kiyev bo‘lgan. Shuningdek, Dnepropetrovsk, Sumi, Xarkov, Chernigov va Kiyev viloyatlari ham zarba ostida qoldi. Hozirga qadar 23 kishi jarohatlangani ma’lum.