Zelenskiy Rossiyaga yangi uzoq masofali zarbalar berilishini e’lon qildi

Ukraina prezidenti Vladimir Zelenskiy Ukraina harbiylari Rossiyaga qarshi yangi uzoq masofali zarbalar tayyorlayotganini aytdi.

Ukraina yetakchisining harbiy rahbariyat bilan uchrashuvi yakunlari bo‘yicha kechki murojaati aks etgan tegishli videolavha uning "Telegram" kanalida e’lon qilingan.

Zelenskiyning so‘zlariga ko‘ra, Ukraina Qurolli kuchlari bo‘linmalari "urushni Rossiya hududiga o‘tkazish uchun hamma narsani qiladi".

"Biz uzoq masofadan yangi zarbalarimizni tayyorlayapmiz", dedi u.

Zelenskiy shuningdek, Kiyev Rossiya armiyasining “hujumkor harakatlarni rivojlantirish niyatlari va urinishlarini” ko‘rayotganini, biroq har bir bunday urinish “Ukraina harbiylarining chidamliligi bilan bo‘g‘ilib qolganini” ta’kidladi.

Ukraina prezidentining qo‘shimcha qilishicha, Rossiya armiyasi yozda o‘z qo‘mondonligining o‘sish bo‘yicha kutganlaridan “sezilarli darajada orqada” qolgan.

Zelenskiy bilan uchrashuvda Ukraina mudofaa vaziri Rustem Umerov, Ukraina Qurolli kuchlari bosh qo‘mondoni Aleksandr Sirskiy va Ukraina Bosh shtab boshlig‘i Andrey Gnatov ishtirok etdi.