Rossiya BMT va AQShga Ukraina tomonidan hujumga uchragan ob’ektlar ro‘yxatini topshirdi

Rossiya BMT va AQShga moratoriy boshlanganidan beri Ukraina tomonidan hujumga uchragan ob’ektlar ro‘yxatini topshirdi.

Bu haqda Rossiya Tashqi ishlar vaziri Sergey Lavrov ma’lum qildi.

"Biz Rossiya Mudofaa vaziri Andrey Belousov Xavfsizlik kengashi yig‘ilishida keltirgan qoida buzilishi holatlari ro‘yxatini Qo‘shma Shtatlar prezidentining milliy xavfsizlik bo‘yicha maslahatchisi Mayk Uolsga va AQSh Davlat kotibi Marko Rubioga yetkazdik, shuningdek, uni BMT va YEXHTdagi vakillarimizga ham yubordik. Ular bu ma’lumotlar asosida Ukraina hukumati va’dasining naqadar ishonchsiz ekanini ko‘rsatib berishi mumkin", — dedi Lavrov.

Rossiya Tashqi ishlar vazirining ta’kidlashicha, Moskva Ukraina tomonidan qilinayotgan qoidabuzarliklarga qaramay, kelishuvga amal qilishda davom etmoqda.

Eslatib o‘tamiz, avvalroq Ukraina ham Rossiya energiya ob’ektlariga zarba berishni vaqtinchalik to‘xtatish bo‘yicha kelishuvga amal qilmayotganini ma’lum qilgan edi.