Rossiya bilan chegaradosh Polsha harbiy tayyorgarlikni jadallashtirmoqda – sabab nima?

Polsha 2027 yilgacha yiliga 100 ming ko‘ngilli harbiyni tayyorlashni rejalashtirmoqda.

Polsha bosh vaziri Donald Tusk kelasi yildan boshlab fuqarolarga harbiy tayyorgarlik taklif etish rejasini e’lon qildi.

Maqsad 2027 yilga kelib har yili 100 ming ko‘ngillini tayyorlashga erishish. Hozirgi kunda Polsha yiliga taxminan 35 ming kishini o‘qitmoqda.

"Biz amalda zaxiradagi qo‘shin tuzishimiz kerak va bizning harakatlarimiz aynan shu maqsadga qaratilgan... Bu urush holatida juda foydali bo‘ladi," dedi Tusk.

Amerika Qo‘shma Shtatlarining Ukrainaga nisbatan yondashuvining o‘zgarishi tufayli Yevropa mudofaa tizimi o‘zgarayotgan bir paytda, Tusk polyaklarni milliy mudofaaga yanada yaxshiroq tayyorlashga harakat qilmoqda.

"18 yoshdan 60 yoshgacha bo‘lgan har qanday qiziquvchi shaxs o‘quv kursini qanday o‘tash haqida batafsil ma’lumot oladi," dedi u va ko‘ngillilar uchun boshqa rag‘batlantiruvchi choralar ham ko‘zda tutilganini qo‘shimcha qildi.

Polsha Ichki ishlar vazirligi yaqin orada aholiga urush davrida yuzaga kelishi mumkin bo‘lgan falokatlar, jumladan, turli xil xavfli vaziyatlar yoki uzoq muddatli elektr ta’minoti uzilishlariga qanday tayyorgarlik ko‘rish to‘g‘risida ma’lumot berishini e’lon qildi.

Rossiya bilan chegaradosh bo‘lgan Polsha, mudofaaga NATOning boshqa Yevropa a’zolariga qaraganda ko‘proq mablag‘ sarflaydi. 2022 yilda Rossiyaning Ukrainaga bostirib kirishidan beri Polsha, shuningdek, NATO davlatlari orasida aholi jon boshiga eng ko‘p mablag‘ sarflaydigan mamlakatga aylandi.