Shu kunlarda Rim shahrida joylashgan “Viale Dai Romanisti” sport majmuasida o‘zbek milliy sport turi sanalgan kurash bo‘yicha murabbiylar uchun seminar mashg‘ulotlari o‘tkazilmoqda.
Xalqaro kurash instituti, Xalqaro kurash assosiasiyasi va Italiya kurash akademiyasi hamkorligida tashkil etilgan seminarda italiyalik bir guruh kurash mutaxassislari kurashning 7 ta asosiy usullariga tegishli bo‘lgan texnikalarni o‘rganish asnosida ushbu usullarning to‘g‘ri bajarilishini nazariy va amaliy mashg‘ulotlarda ko‘rib chiqmoqda.
Seminar mashg‘ulotlarini o‘zbekistonlik bir guruh kurash mutaxassislari, jumladan Xalqaro kurash assosiasiyasi bosh kotibi Rizo Nosiriy va kurash bo‘yicha O‘zbekiston terma jamoasining tajribali murabbiyi Olim Ravshanov olib bormoqda.
Xalqaro kurash assosiasiyasi matbuot xizmati xabariga ko‘ra, kurashning Yevropada rivojlanishi va ommaviyligini ta’minlashga qaratilgan bunday tadbirlarni ko‘hna qit’aning boshqa shaharlarida ham uyushtirish nazarda tutilgan.
