Rasmiy ma’lumotlarga ko‘ra, o‘tgan yil davomida Qatar aholisi 13,2 foizga o‘sdi, chunki Fors ko‘rfazidagi kichkina arab davlati futbol bo‘yicha kelasi oyda bo‘lib o‘tadigan Jahon chempionati arafasida misli ko‘rilmagan muxlislar oqimini boshqarish uchun minglab xorijlik ishchilarni yollamoqda, deb xabar beradi Reyter.
Sentyabr oyida to‘plangan va Qatar statistika idorasi o‘tgan hafta e’lon qilgan ma’lumotlarga ko‘ra, o‘tgan yil davomida 370 mingga yaqin odam Qatarga ko‘chib o‘tganidan keyin mamlakat aholisi 2,94 millionni tashkil etdi.
Qatar fuqarolari esa 380 mingga yaqin bo‘lib, aholining aksariyat qismini kam daromadli mehnat muhojirlari va boshqa xorijliklar tashkil qiladi.
Jahon chempionati tashkilotchilari kadrlar yetishmasligiga duch kelishmoqda, chunki Qatar eng yirik futbol tadbirida 1,2 millionga yaqin mehmonni qabul qilishga tayyorlanyapti, bu uning infratuzilmasi, mehmondo‘stligi va xavfsizlik sektoriga katta bosim bo‘lishi kutilmoqda.
Accor mehmonxona operatori muxlislar uchun vaqtinchalik turar joy vazifasini o‘taydigan kvartira va uylardagi 65 000 xonaga xizmat ko‘rsatish uchun 12 000 nafar vaqtinchalik xorijiy xodimlarni jalb qilmoqda. Qatar Turkiya bilan 3000 dan ortiq maxsus xizmat polisiyasi xodimlarini ta’minlash bo‘yicha shartnoma tuzgan va Pokiston ham turnir davomida Qatarda qo‘shin joylashtirishga rozi bo‘ldi.
Qatar tezyurar yo‘llar, yettita futbol stadioni, mehmonxonalar va osmono‘par binolar qurdi, byudjet hujjatlariga ko‘ra, infratuzilma uchun kamida 229 milliard dollar sarfladi. Qatar aholisining yarmiga yaqini qurilish sohasida band.
Turnirdan keyingi yillarda Xalqaro Valyuta Jamg‘armasi taxminiga ko‘ra, Qatar aholisi yiliga 1,2 foizga kamayib, 2027 yilga borib 2,5 million kishini tashkil etadi.
