Polsha bosh vaziri: "NATOning Boltiqbo‘yi patrul operasiyasi 90 kun davom etadi"

Boltiq dengizida suv osti infratuzilmasini himoya qilish bo‘yicha Boltiqbo‘yi qo‘riqchilari patrul operasiyasi 90 kun davom etadi.

Bu haqda Xelsinkida bo‘lib o‘tgan Shimoliy va Boltiqbo‘yi davlatlari sammitidan so‘ng Polsha bosh vaziri Donald Tusk jurnalistlarga ma’lum qildi.

"Bu 90 kun bo‘ladi, biroq Boltiq dengizida harbiy nazoratni kengaytirish va kuchaytirishning aniq imkoniyati bilan", — dedi Tusk.

Uning so‘zlariga ko‘ra, har bir ishtirokchi operasiya uchun qancha jihoz ajratishi hozircha hal qilinmagan. Tuskning ta’kidlashicha, Polsha harbiy-dengiz kuchlarining to‘rtta kemasi doimiy ravishda muhim infratuzilmani, jumladan, Gdansk porti va Svinoustyedagi gaz portini qo‘riqlaydi.

Seshanba kuni Xelsinkida bo‘lib o‘tgan Boltiq dengizi davlatlari sammitida NATO Bosh kotibi Mark Ryutte Boltiq dengizida patrullik qilish uchun Boltiqbo‘yi qo‘riqchilari missiyasi tuzilganini e’lon qildi.