Pokistonda terakt oqibatida 11 kishi halok bo‘ldi

Pokistonning shimoli-g‘arbidagi Xayber-Paxtunxva viloyatida sodir bo‘lgan portlash oqibatida 11 kishi halok bo‘ldi, yana 30 kishi jarohatlandi. Bu haqda Rescue 1122 tezkor xizmati ma’lum qildi.

Hujum uchun javobgarlikni Pokistondagi qurolli guruh — «Tehrik-i Tolibon Pokiston» (TTP) o‘z zimmasiga oldi.

Portlash Dera Ismoil-Xon okrugining Darazinda hududidagi Amana Mela yaqinida sodir bo‘lgan. Voqea joyiga Darazindadan qutqaruv guruhlari yetib borib, jabrlanganlarga yordam ko‘rsatgan. Jarohatlanganlar shifoxonalarga olib ketilgan.

Xayber-Paxtunxva viloyati Pokistonning Afg‘oniston bilan chegarasiga yaqin joylashgan. Mazkur hudud vaqti-vaqti bilan qurolli guruhlar hujumlariga uchrab turadi.