Pokiston va AQSh bojxona muzokaralarini muvaffaqiyatli yakunladi — eksport uchun yangi imkoniyatlar ochilmoqda

Pokiston hukumati AQSh bilan bojxona tariflari bo‘yicha muzokaralarni muvaffaqiyatli yakunlaganini e’lon qildi. Bu haqda mamlakat moliya vaziri maslahatchisi Xurram Shexzod ijtimoiy tarmoq X (sobiq Twitter) orqali ma’lum qildi.

Yangi kelishuvga ko‘ra, pokistonlik eksportchilar uchun AQSh bozorida 19%lik tarif joriy etiladi.

«Bu qaror — Vashingtonning muvozanatlashtirilgan va strategik yondashuvini aks ettiradi. Bu Pokiston mahsulotlariga Janubiy va Janubi-Sharqiy Osiyo davlatlari bilan raqobatda o‘z raqobatbardoshligini saqlab qolish imkonini beradi», — deb ta’kidladi Shexzod.

📈 Tekstil, energetika va sun’iy intellekt — asosiy eksport tarmoqlari

Kelishuv Pokiston uchun, ayniqsa, tekstil sanoatida katta eksport salohiyatini kengaytirish imkonini beradi. Bu tarmoq mamlakat iqtisodiyotining asosiy sohalaridan biri hisoblanadi.

Shuningdek, Pokiston tomoni quyidagi sohalarda ham eksport o‘sishini kutmoqda:

• tog‘-kon sanoati

• energetika

• kriptovalyutalar

• sun’iy intellekt

• foydali qazilmalarni qayta ishlash

Bayonotda, shuningdek, AQSh bilan strategik hamkorlikni yanada chuqurlashtirish va barqaror iqtisodiy o‘sish maqsadlariga erishish muhimligi alohida qayd etilgan.