Peskov: "Moskva va Vashington o‘rtasidagi ishonch telefoni ishlatilmaydi"

Kubadagi raketa inqirozidan so‘ng yaratilgan Kreml va Oq uy o‘rtasidagi ishonch telefoni hozir ishlamayapti.

Bu haqda Rossiya prezidenti matbuot kotibi Dmitriy Peskov ma’lum qildi.

Hozirda ushbu aloqa kanalidan foydalanilmoqdami, degan savolga u salbiy javob berdi. "Yo‘q. Bizda ikki prezident, Rossiya va Amerika Qo‘shma Shtatlari o‘rtasida aloqa uchun maxsus xavfsiz liniya mavjud", - deya tushuntirdi Kreml vakili.

Peskovning ta’kidlashicha, hozir bu liniya orqali hech qanday aloqa yo‘q, hatto favqulodda aloqalar ham. "Yo‘q", dedi u tegishli savolga javob berib.

Kreml sayti ma’lumotlariga ko‘ra, Putinning AQSh rahbari bilan so‘nggi telefon muloqoti 2022 yil 12 fevralda bo‘lib o‘tgan. U Jo Bayden bilan bir soatdan ortiq suhbatlashdi, asosiy mavzular Rossiya uchun xavfsizlik kafolatlari va Ukraina atrofidagi vaziyat bo‘ldi. Shuningdek, Rossiya Federasiyasi va AQSh o‘rtasidagi ikki tomonlama munosabatlar haqida ham so‘z bordi.

Vashington-Moskva ishonch telefoni Kubadagi raketa inqirozidan keyin SSSR va AQSh rahbarlari o‘rtasida favqulodda muzokaralar o‘tkazish uchun yaratilgan. U 1963 yil 30 avgustda ish boshlagan. Sovuq urush davrida liniya favqulodda vaziyatlarda yaxshi xizmat qilgan, biroq so‘nggi yillarda Rossiya va AQSh prezidentlari kerak bo‘lganda to‘g‘ridan-to‘g‘ri telefon orqali muloqot qilishgan.