Joriy yilning so‘ngida O‘zbekistonda Oliy Majlis Qonunchilik palatasi hamda xalq deputatlari viloyat, tuman va shahar Kengashlariga saylov bo‘ladi. O‘zbekistonliklar ushbu siyosiy voqea haqida ma’lumotga egami? Umuman olganda, siyosiy partiyalar va ularning nomzodlarini qanchalik bilishadi? Togri.uz odamlarga ushbu savollar bilan yuzlandi.
Ko‘pchilik saylov haqida ma’lumotga ega ekanligi ma’lum bo‘ldi. Shunday bo‘lsa-da, respondentlar orasida ushbu siyosiy jarayonga befarqlar hamda bu borada deyarli tushunchaga ega bo‘lmaganlar ham yetarlicha bor edi. Kimdir “Prezidentlikka saylov bo‘ladimi?” deya savolga savol bilan javob bergan bo‘lsa, yana kimdir “Viloyatlar bo‘yichami” deya tusmol javob qaytardi.
Ekologik partiya o‘zini aholiga tanitmagani javoblardan ko‘rinib qoldi. “Yurtimizda nechta siyosiy partiya bor?” deb so‘ralganda, aksar respondentlar “4 ta” deb javob qaytardi. Rasman ish yurita boshlaganiga uncha ko‘p vaqt bo‘lmagan Ekologik partiya haqida esa ko‘pchilikning mutlaq xabari yo‘q ekanligi ma’lum bo‘ldi.
So‘rovda ishtirok etganlarning aksari partiyalar faoliyati yetarlicha targ‘ib qilinmayapti degan fikrda.
Respondentlardan biri “O‘zini (siyosiy partiyalar) xalqqa tanishtirmagan. Shuning uchun ularning faoliyati haqida bilmaymiz” degan bo‘lsa, yana biri “Bu haqida shaxsan men ma’lumotga ega emasman. Partiyalarni ham, deputatlarni ham endi-endi taniyapmiz-da”, deydi.
O‘zbekiston Markaziy saylov komissiyasi raisi Mirzo-Ulug‘bek Abdusalomov partiya va nomzodlar haqida bilmagani uchun saylovchi aybdorligini ta’kidlagan edi. Aftidan saylovchilar bu fikrga qo‘shilmaydi.
