Panama hukumati AQSh harbiy kemalarining Panama kanali orqali bepul o‘tishi haqidagi AQSh bayonotini rad etdi

Panama kanali atrofida chalkashlik yuzaga keldi. AQSh Davlat departamenti Amerika harbiy kemalarining kanal orqali bepul o‘tishi bo‘yicha kelishuvga erishilganini e’lon qildi. Ularning ta’kidlashicha, Panama AQSh davlat kemalari uchun barcha to‘lovlarni bekor qilishga rozi bo‘lgan, bu esa har yili millionlab dollar tejash imkonini beradi.

Biroq, bir necha soat o‘tib, Panama kanali administrasiyasi bu bayonotni qat’iyan rad etdi. Rasmiy bayonotda aytilishicha, kanal tariflari va qoidalarida hech qanday o‘zgarish bo‘lmagan va AQSh bilan muzokaralar hali davom etmoqda.

«Panama kanali Amerika rasmiylari bilan harbiy kemalarning o‘tishi masalasida muloqot qilishga tayyor», — deyiladi kanal ma’muriyatining bayonotida.

AQSh bayonoti davlat kotibi Marko Rubioning Panamaga tashrifidan keyin paydo bo‘ldi. U agar kanalni ishlatish shartlari o‘zgarmasa, Vashington muayyan choralar ko‘rishi mumkinligini ta’kidladi. Shuningdek, AQSh kanal xavfsizligini ta’minlashga majbur bo‘lsada, undan foydalanish uchun to‘lov to‘lashiga norozilik bildirdi.

Bundan oldin Donald Tramp 1999 yildan beri Panamaning to‘liq ixtiyorida bo‘lgan kanal ustidan nazoratni qaytarib olish bilan tahdid qilgan edi. Asosiy bahs AQSh harbiy kemalari uchun to‘lov masalasida davom etmoqda. Panama haqiqatdan ham yon berganmi yoki bu faqat diplomatik tushunmovchilikmi — hozircha noma’lum.