Jurnalist Seymur Xersh Vashingtondagi manbalariga tayanib, Ukrainaning Buyuk Britaniyadagi elchisi va Ukraina armiyasining sobiq bosh qo‘mondoni Valeriy Zalujniy Ukrainaning navbatdagi prezidenti bo‘lishi mumkinligini xabar qildi. Uning so‘zlariga ko‘ra, u bir necha oy ichida bu lavozimda Vladimir Zelenskiyning o‘rnini egallashi mumkin.
Seymur Xersh Substack platformasidagi nashrida qo‘shimcha qilganidek, agar AQSh prezidenti Donald Tramp shunday qaror qabul qilsa, Vladimir Zelenskiy o‘z lavozimini tark etadi. Jurnalistning suhbatdoshlaridan biri, shuningdek, Zelenskiy o‘z lavozimidan "zo‘rlik bilan" chetlashtirilishi mumkinligini aytdi.
Seymur Xersh turli vaqtlarda Associated Press va The New York Times gazetalarida ishlagan. 1970 yilda u Vyetnam urushi paytida amerikalik askarlarning tinch aholini o‘ldirishini tergov qilgani uchun Pulitser mukofotiga sazovor bo‘ldi. So‘nggi yillarda u, jumladan, AQShning “Shimoliy oqim” quvurini yo‘q qilishda ishtiroki va Vashington Kiyevga yoqilg‘i sotib olish uchun ajratgan mablag‘larni o‘zlashtirishda Vladimir Zelenskiyning aybi borligini ta’kidladi.
