Ozarbayjonda "Shusha global media forum" boshlandi

Joriy yilning 20-22 iyul kunlari Shusha shahrida "Yolg‘on narrativlarni fosh qilish: dezinformasiyaga qarshi kurash" mavzusida ikkinchi an’anaviy Media-forum bo‘lib o‘tadi.

Bugun o‘z ishini boshlagan nufuzli tadbirda taxminan 50 ta davlatdan 150 dan ziyod xorijiy mehmonlar, shu jumladan, Axborot va ommaviy kommunikasiyalar agentligi rahbari A.Xodjayev va mutasaddi xodimlar, shuningdek, 30 ta mamlakatdan Axborot agentliklari, 3 ta xalqaro tashkilot hamda 82 ta xorijiy va mahalliy ommaviy axborot vositalari qatnashmoqda.

Media forumning ochilish marosimida Ozarbayjon davlat rahbari Ilhom Aliyev tashrif buyurdi hamda ishtirokchilarni media sohasida yuqori ahamiyatga ega bo‘lgan global tadbirda ishtiroklari bilan qutladi.

"Shusha global media forum – dunyo miqyosidagi keng ko‘lamli tadbir hisoblanadi. Ushbu konferensiya xalqaro maydonda birinchi raqamli tadbirlardan desak, mubolag‘a bo‘lmaydi, dedi I.Aliyev so‘zi davomida.

Media-forum sobiq Sovet Ittifoqi hududida ilk marotaba o‘tkazilmoqda va bu biz uchun Oliy ligaga chiqishimiz uchun tengsiz imkoniyatdir. Chunki forum doirasida tashkil etilgan media maydonda biz nafaqat tashabbuslar bilan chiqamiz, balki mohiyatan ham ko‘plab ishlarni amalga oshiramiz. Hozirda biz rivojlanayotgan mamlakatlar bilan Global janub hamda Global shimol o‘rtasida ko‘prik qurish uchun faol sa’y-harakatlarni amalga oshirmoqdamiz, deya ta’kidladi Ozarbayjon davlat rahbari.

📌 Ma’lumot uchun: uch kunlik Media-forum doirasida bo‘lib o‘tadigan panel sessiyalarida –

🔘Ta’sirni baholash: keng ko‘lamli dezinformasiyani tushunish;

🔘Dezinformasiyalarga yanada barqaror jamiyatni qurish siyosati va tashabbuslar;

🔘"Texnologiya va dezinformasiya";

🔘Sun’iy intellektning reallik, OAV va dezinformasiyaga ta’siri: mediasavodxonlikni targ‘ib qilish;

🔘Mintaqaviy ta’sir ko‘rstaish hamda OAV mavzulari yuzasidan keng muhokamalar olib boriladi.

Bundan tashqari, "Yashil dunyo –COP29 yo‘lida birdamlik" mavzusida taqdimot va savol-javoblar, Lochin shahri bo‘ylab ekskursiya, "Buyuk qaytish: Qorabog‘" filmi namoyishi, Turkiy axborot agentligi Alyansi Ijrochi qo‘mitasi yig‘ilishi o‘tkazilishi ko‘zda tutilgan.