Ochlikning navbatdagi to‘lqini xalqimizga tahdid solmoqda - G‘azolik fuqaro

G‘azolik Ahmad al-Najjorning aytishicha, anklav bo‘ylab gumanitar yordam zaxiralari tez tugab bormoqda.

Al-Najjor urush davomida Isroil armiyasi tomonidan hujumga uchragan G‘azo janubidagi "xavfsiz hudud" deb ataluvchi al-Mavosiydan Al-Jazeera telekanaliga bergan intervyusida, ko‘chib kelgan falastinliklar xavfsizlik topishga umid qilayotganini aytdi.

"Bu yerda, al-Mavosiyda, chodirimizni o‘rnatish uchun joy topganimizdan minnatdormiz," dedi u, biroq oziq-ovqat va boshqa zarur narsalarni topish hamon qiyin ekanligini qo‘shimcha qildi.

Al-Najjorning so‘zlariga ko‘ra, u yaqinda oilasi uchun oziq-ovqat izlagan, ammo uch soatdan so‘ng "bitta ham non topolmay" qaytib kelgan.

"Biz qo‘rquv ichida yashayapmiz, chunki non ham, oziq-ovqat ham yo‘q - va ochlikning navbatdagi to‘lqini xalqimizga tahdid qilmoqda. Yana shuni ta’kidlash kerakki, bu Isroil tomonidan odamlar uchun xavfsiz boshpana deb e’lon qilingan va gumanitar ehtiyojlar qondirilishi kerak bo‘lgan gumanitar hududdagi vaziyatdir."