OCHL-2. Babayanning "Andijon"dagi debyuti omadsiz chiqdi va jamoa turnirni tark etdi

«Andijon» OCHL-2 musobaqasi guruh bosqichi 6-turi doirasida Qatarda «Al-Ahli» klubi mehmoni bo‘ldi. Uchrashuv boshidanoq andijonliklar faol harakat qilishga intilishdi. Ammo ilk xavfli vaziyatni mezbonlar yuzaga keltirishdi: uchrashuvning 5-daqiqasida Eldor Adhamov ishonchli seyvi bilan jamoasini goldan asrab qoldi.

O‘yinning birinchi bo‘limida «Andijon» asosan standart vaziyatlar orqali hujumlar uyushtirdi. 11 va 12-daqiqalarda ketma-ket burchak zarbalari amalga oshirildi. Biroq 26-daqiqada raqib standart vaziyatdan unumli foydalanib, hisobni ochdi — 1:0. Oradan ko‘p o‘tmay, andijonliklar yana bir goldan omon qoldi: to‘p darvoza ustuniga tegib qaytdi.

Birinchi bo‘limga qo‘shib berilgan daqiqalarda hisob o‘zgarmadi va jamoalar tanaffusga «Al-Ahli»ning minimal ustunligi bilan yo‘l olishdi.

Mehmonlar ikkinchi bo‘limda ham faollikni oshirishga harakat qildi, burchak zarbalari orqali bosimni kuchaytirdi. Ammo 22-daqiqada «Al-Ahli» futbolchisi uzoq masofadan aniq zarba yo‘llab, jamoasining ikkinchi golini kiritdi — 2:0.

Uchrashuvning so‘nggi daqiqalarida andijonliklar bir necha bor hisobni qisqartirishga yaqin keldi. Usmonali Ismonaliyevning jarimadan bergan zarbasini raqib posboni qiyinchilik bilan qaytardi. Abdumannopovning zarbasi noaniq chiqdi, Usmonovning zarbasidan so‘ng to‘p to‘singa tekkan holda maydonni tark etdi.

Shu tariqa, uchrashuv oxirigacha hisob o‘zgarmadi. «Andijon» «Al Ahli»ga qarshi safarda 0:2 hisobida mag‘lubiyatga uchradi hamda OCHL-2dagi yurishini yakunladi.

Turkmanistoning "Arkadag‘" klubi bugun o‘z maydonida Bahraynning "Al-Xolidiya" jamoasini mag‘lub etib (1:0), "V" guruhida 2-o‘rin orqali pley-offga chiqdi.

OCHL-2. "V" guruhi, 2-tur
"AL-AHLI" - "ANDIJON" - 2:0
Gollar: Vlap (26, 65)