Nima uchun AQSh Ukrainaga Rossiyaga uzoq masofali raketalar bilan hujum qilishga ruxsat berdi?

AQSh qarori avgust oyida Ukraina qo‘shinlari tomonidan bosib olingan Rossiyaning Kursk viloyatiga Shimoliy Koreya qo‘shinlari kiritilganidan keyin qabul qilingan.

Ukraina prezidenti Vladimir Zelenskiy bir necha oydan beri G‘arb ittifoqchilari, jumladan, AQSh va Buyuk Britaniyani Rossiyaga qarshi raketalardan foydalanishga ruxsat berish uchun bosim o‘tkazib keldi, chunki Moskva kuchlari Ukraina sharqida sekin, ammo barqaror yutuqlarga erishmoqda.

Al-Jazira diplomatik muxbiri Jeyms Baysning aytishicha, «ushbu G‘arb davlatlarining maqsadi Ukrainani, xususan, Ukraina ishg‘ol qilgan Rossiya hududi, Kurskda uni qo‘llab-quvvatlashdir».

AQSH, Ukraina va Janubiy Koreya rasmiylariga ko‘ra, 12 mingga yaqin Shimoliy Koreya askari Rossiyaga jo‘natilgan. Ular, shuningdek, Pxenyanni Moskvaga qurol yetkazib berishda ayblagan.

Mart oyida AQSh Ukrainaga raketalarni yashirin ravishda yuborgan bo‘lsada, Ukrainaga Rossiya hududi ichida zarba berish uchun ulardan foydalanishga ruxsat berilmagan. Aprel oyining oxiriga kelib, Ukraina Rossiya tomonidan anneksiya qilingan Qrimda bu raketalardan ikki marta foydalangan.

Bayden prezidentlik muddati tugashiga atigi to‘qqiz hafta qolganida shunday qaror qabul qildi. Uning vorisi urushni tezda tugatish bo‘yicha muzokaralar olib borishga va’da bergan, bu esa Ukrainaning eng yirik qurol yetkazib beruvchisi bo‘lgan AQSh unga harbiy yordam yuborishda davom etadimi yoki yo‘qmi degan noaniqlikni keltirib chiqardi.

Yaqinda AQSh Ukrainaga raketalardan foydalanishga ruxsat berishi haqida xabarlar paydo bo‘lgan edi. Sentyabr oyida AQSh Davlat kotibi Entoni Blinken va uning Buyuk Britaniya tashqi ishlar vaziri Devid Lemmi Kiyevga tashrif buyurib, Zelenskiy bilan uchrashgan edi. Zelenskiy rasmiylarga tashrifi uchun minnatdorchilik bildirar ekan, o‘zining X akkauntida shunday yozdi: «Ukraina dalillarini eshitish muhim. Bunga uzoq masofali qurollar ham kiradi».

Tashrifdan bir kun oldin Blinken Londonda jurnalistlarga u va Lemmi bu masalani «juda diqqat bilan tinglashlarini» va hisobot berishlarini aytdi. O‘sha kuni Bayden jurnalistlarga: «Biz buni hozir ishlab chiqyapmiz», degan edi.