Nega AQSh Falastinni tan olmaydi?

Tramp Britaniyani Falastin mustaqilligini tan olish qarori uchun tanqid qildi.

AQSh prezidenti Donald Tramp Buyuk Britaniya bosh vaziri Kir Starmerning Falastinni mustaqil davlat sifatida tan olish rejalariga keskin qarshi chiqdi. Oq uy rahbari Isroilga to‘liq qo‘llab-quvvatlash va’da qildi.

Air Force One bortida Tramp shunday dedi:

«Agar siz Falastinni tan olsangiz, demak XAMASni rag‘batlantirayapsiz. Biz bunday qilmaymiz».

Bu so‘zlar Isroil bosh vaziri Binyamin Netanyaxuning so‘zlarini aynan takrorlaydi. U ham Falastinni tan olish XAMAS pozisiyalarini «mustahkamlaydi» degan fikrda. Biroq Fransiya, Britaniya va yana 14 ta davlat bu fikrga qo‘shilmaydi. Ular sentyabr oyida BMT Bosh Assambleyasida Falastinni tan olish niyatida. Britaniya TIV ta’kidlashicha, tan olish tinchlik va ikki davlatli yechim uchun kalit bo‘ladi.

Hafta boshida Tramp Shotlandiyada Starmer bilan uchrashdi. O‘shanda u Londonning tan olish rejasini tanqid qilmadi. Aksincha, «Agar u shunday pozisiyani egallagan bo‘lsa, men qarshi emasman», dedi.

Bu sukut Makronning bayonotiga nisbatan Trampning keskin reaksiyasi bilan keskin farq qiladi. Fransiya prezidenti birinchi bo‘lib Falastinni tan olishini aytgandi. Shunda Tramp:

«Bu so‘zlar hech narsa anglatmaydi», — deb javob bergan.

Bu hafta Tramp kutilmaganda Isroil Bosh vaziri Netanyaxuni ham tanqid qildi. Jurnalistlar «Gazada bolalar ach qolayotgani rostmi?» deb so‘rashganda, Tramp shunday javob berdi:

«Televizorda bolalar och qolgani ko‘rinadi. Bunday narsani soxtalashtirib bo‘lmaydi».

Shu bilan birga, AQShning Isroildagi elchisi Mayk Xakabi ta’kidlashicha, «Tramp va Netanyaxu o‘rtasidagi aloqa har qachongidan ham kuchli».

Biroq so‘nggi so‘rovlar boshqacharoq manzarani ko‘rsatmoqda. The Guardian ta’kidlashicha, Trampning ko‘plab tarafdorlari orasida Isroilga bo‘lgan qo‘llab-quvvatlash pasayib bormoqda. Gallup ma’lumotlariga ko‘ra, AQSh aholisi orasida Gazodagi harbiy harakatlarni qo‘llab-quvvatlash darajasi 32% gacha tushib ketgan.

Yoshlar va ba’zi MAGA harakati tarafdorlari orasida Isroilga nisbatan tanqid kuchaymoqda. Masalan, Trampning sobiq maslahatchisi Stiv Bennon Gazodagi vaziyat respublikachilarning Isroilga ishonchini susaytirmoqda, deb ta’kidladi. Kongress a’zosi Mardjori Teylor Grin esa Isroil harakatlarini ochiqcha «genosid» deb atadi.