Navoiyda qo‘ylar bo‘g‘izlab ketilayotgani haqidagi xabarga rasmiy munosabat bildirildi

Xatirchi tumanida fuqarolarga tegishli bo‘lgan qo‘y-echkilarga shoqol (chiyabo‘ri) hujum qilgan.

Navoiy viloyatining Xatirchi tumanida 30 boshdan ziyod qo‘yni noma’lum hayvon bo‘g‘izlab ketgani haqida xabarlar tarqaldi. Viloyat Ekologiya boshqarmasi holat yuzasidan rasmiy ma’lumot berdi.

Xabarda yozilishicha, 9 iyuldan 10 iyul kuniga o‘tar kechasi tumandagi "Yangirabod" MFYda istiqomat qiluvchi fuqarolarning qo‘y-echkilariga shoqol (chiyabo‘ri) hujum qilgan.

Tuman IIB, tuman veterinariya bo‘limi, tuman SEOM bo‘limi hamda tuman obodonlashtirish bo‘limi mas’ul xodimlari mazkur hodisaning kelib chiqish sabablarini o‘rganishmoqda.

Ayni paytda 15 bosh qo‘y-echki davolanmoqda. Chiyabo‘rini tutish uchun barcha choralari ko‘rilmoqda.