NASA: sayyoramizda ekstremal ob-havo hodisalari keskin oshdi

Dunyo bo‘ylab suv toshqini va qurg‘oqchilik kabi ekstremal ob-havo hodisalarining intensivligi keskin oshdi.

NASA tadqiqoti shuni ko‘rsatdiki, ular tez-tez, uzoqroq va og‘irroq bo‘lib bormoqda. Bu tendensiya so‘nggi besh yil ichida sezilarli darajada oshdi va 2024 yildagi ko‘rsatkichlar 2003-2020 yillardagi o‘rtacha ko‘rsatkichdan ikki baravar yuqori bo‘ldi.

Tadqiqot davomida olimlar sayyoradagi ekologik o‘zgarishlarni kuzatuvchi Grace sun’iy yo‘ldoshi ma’lumotlarini tahlil qilishdi. Ekstremal ob-havo hodisalarining keskin o‘sishi kutilmagan holat edi. Mualliflarning ta’kidlashicha, ular so‘nggi ma’lumotlardan “hayratda va xavotirda”.

Buning sababi, shubhasiz, iqlim o‘zgarishi. Ammo ekstremal hodisalarning intensivligi global haroratdan tezroq o‘sib bormoqda. Olimlarning fikriga ko‘ra, odamlar tabiiy ofatlarning ta’siriga tayyor emas edi. Ular infratuzilmaga katta zarar yetkazadi va odamlarning qurbon bo‘lishiga olib keladi. Iqlim inqirozining eng jiddiy oqibatlaridan biri suv ta’minoti tizimlarining buzilishi bilan bog‘liq.

Tadqiqot shuni ko‘rsatdiki, ob-havo hodisalarining intensivligi o‘rtacha global harorat bilan ko‘p jihatdan bog‘liq. El-Ninyo kabi boshqa omillarning ta’siri kamroq seziladi. Bashoratlarga ko‘ra, harorat ko‘tarilishi davom etar ekan, qurg‘oqchilik va suv toshqinlari kuchayishi mumkin, deb xabar beradi mir24.tv.