Moskva va atrofidagi hududga yirik dron hujumi: uch kishi halok bo‘ldi

Moskva va Moskva viloyati bir yildan ortiq vaqt ichidagi eng yirik dron hujumiga uchradi. Hujum oqibatida kamida uch kishi halok bo‘ldi, 17 kishi turli darajada jarohat oldi.

Rossiya rasmiylariga ko‘ra, dronlar Moskva neftni qayta ishlash zavodi, Zelenograd hamda poytaxtning shimoli-g‘arbiy qismidagi ob’ektlarga zarba bergan. Ayrim hududlarda yong‘inlar yuz bergani, sanoat ob’ektlari va infratuzilmaga zarar yetgani ma’lum qilindi.

Moskva viloyati gubernatori Andrey Vorobyovning aytishicha, hujum 17 may kuni tong soatlarida boshlangan. Asosiy zarbalar Moskva halqa yo‘li va Sheremetyevo aeroporti yaqinidagi hududlarga to‘g‘ri kelgan.

Ukraina prezidenti Vladimir Zelenskiy tungi hujumni Rossiyaning Kiyev va boshqa shaharlarga bergan so‘nggi zarbalariga “adolatli javob” deb atadi. Unga ko‘ra, Moskva ham urush oqibatlarini his qilishi kerak.

Tahlilchilar bu hujumni Ukraina tomonining Rossiya hududi ichkarisiga bergan eng katta zarbalaridan biri sifatida baholamoqda.