Misrda arxeologlar noma’lum fir’avnning 3,6 ming yil oldingi qabrini topdilar

The New York Times (NYT) gazetasining yozishicha, misrlik va amerikalik arxeologlar guruhi Misrdagi Nil daryosining chap qirg‘og‘ida joylashgan qadimiy Abidos shahri o‘rnida yoshi 3600 yil bo‘lishi taxmin qilinayotgan noma’lum fir’avnning qabrini topdi. Bu haqda TASS yozmoqda.

Ma’lumotlarga ko‘ra, qabr nekropolda 7 m dan ortiq chuqurlikda joylashgan. Dafn xonasi balandligi deyarli 5 m bo‘lgan tonozli shiftli bir nechta xonalardan iborat. Abidosdagi fir’avn qabrining birinchi kashfiyoti u yerda "yo‘qolgan" qirollik sulolasining mavjudligiga dalil bo‘lib, arxeologlar tomonidan 10 yildan ko‘proq vaqt oldin qilingan.

Qayd etilishicha, bu qabr va Seneb-Key maqbarasi saqlanib qolgan eng qadimgi qirollik qabrlaridan bo‘lib, ularda bo‘yalgan bezaklar mavjud. Shuningdek, Abidosdagi qabr vaqt o‘tishi bilan jiddiy zarar ko‘rganligi va uning o‘rnida aniqlanishi mumkin bo‘lgan skelet qoldiqlari topilmagani ko‘rsatilgan. Bundan tashqari, qabr ichida taxminan 1,7 ming yil oldin sodir bo‘lgan talonchilik izlari bor. Papirus chiziqlarida tasvirlangan hukmdorning ismi ham o‘qib bo‘lmaydigan bo‘lib qoldi. Arxeologlarning taxminiga ko‘ra, qabr Abidosda yodgorliklar o‘rnatilgan Senayib yoki fir’avn Pantjeniy ismli podshohning dafn qilingan joyi bo‘lgan.