Microsoft AQSh maktablarida qo‘llaniladigan sun’iy intellekt tizimlari uchun yangi cheklovlar va maxfiylik standartlarini joriy etadi, deb xabar beradi Euronews.
Yangi qoidalar mamlakatning ikkinchi yirik o‘qituvchilar kasaba uyushmasi bilan kelishilgan.
Kelishuvga ko‘ra, o‘quvchilarni sun’iy intellekt tizimlari bilan hissiy aloqani rivojlantirishga yoki ularga qaram bo‘lishga undaydigan hamroh botlar va funksiyalardan foydalanish taqiqlanadi. O‘quvchilarning e’tiborini o‘quv vazifasini bajarish uchun zarur bo‘lganidan uzoqroq vaqtga chorlaydigan funksiyalar ham cheklanadi. Ushbu standartlar yuridik kuchga ega va mustaqil auditlarni nazarda tutadi.
Microsoft o‘zining sun’iy intellekt tizimlarini o‘qitish uchun o‘quvchilar va o‘qituvchilar ma’lumotlaridan foydalanmaslikka va’da berdi. Bunga o‘quvchilarni himoya qilish uchun zarur bo‘lgan cheklangan ma’lumotlar to‘plami kirmaydi. To‘plangan ma’lumotlarni sotish, reklama maqsadlarida yoki yangi mahsulotlarni ishlab chiqish uchun ishlatish mumkin emas.
Kompaniya shuningdek, oilalarga o‘zining sun’iy intellekt vositalari qanday ishlashini va qanday ma’lumotlarni to‘plashini aniq tushuntirishi kerak. Yangi standartlar 1 noyabrdan boshlab AQShdagi maktablar bilan tuzilgan barcha Microsoft shartnomalariga qo‘llaniladi.
OpenAI va Anthropic ham Amerika o‘qituvchilar uyushmasi bilan shunga o‘xshash kelishuvlarni muhokama qilmoqda. Ikkala kompaniya ham ta’limda sun’iy intellekt xavfsizligini mustahkamlash va ma’lumotlarni himoya qilish tashabbuslarini qo‘llab-quvvatlashini aytishdi.
