Meloni Ukrainadan Italiyani himoya qilish uchun foydalanishini aytdi

«Men Ukrainani Kiyev uchun emas, Rim uchun qo‘llab-quvvatladim»: Italiya bosh vaziri mamlakat uchun hujumga uchramasligiga umid qilishdan ko‘ra, ehtimoliy hujumga tayyor turish manfaatliroq ekanini bildirdi.

Italiya bosh vaziri Jorja Meloni Ukrainani Kiyev uchun emas, balki Italiyaning o‘z manfaatlarini himoya qilish maqsadida qo‘llab-quvvatlaganini bildirdi.

«So‘nggi yillarda saylov nuqtai nazaridan qaraganda, Ukrainani qo‘llab-quvvatlamasligim men uchun manfaatliroq bo‘lar edi. Ammo men Ukrainani Kiyev uchun emas, Ukrainani Rim uchun qo‘llab-quvvatladim», — dedi Meloni Il Foglio gazetasiga bergan intervyusida.

Uning so‘zlariga ko‘ra, davlatlar o‘rtasida tinch-totuv yashash qoidalari yo‘qolib, yana kuch huquqi ustuvor bo‘layotgan xalqaro vaziyatda Italiya yo‘qotadigan narsalarga ega. Melonining qo‘shimcha qilishicha, so‘nggi bir necha yilning o‘ziyoq bunday ssenariyning oqibatlarini his qilish imkonini bermoqda.

Bosh vazir davlatning harbiy xarajatlarini oilaning uy xavfsizligi uchun sarflaydigan mablag‘lari bilan ham taqqosladi. Uning so‘zlariga ko‘ra, mudofaa uchun mablag‘ sarflash ommabop mavzu bo‘lmasligi mumkin, biroq bunday xarajatlar zarur.

«Men bu masalada “Italiya birodarlari” partiyasi hech qachon demagogiyaga berilmaganidan faxrlanaman», — dedi Meloni.

Rossiya Italiya va Yevropa uchun tahdidmi, degan savolga javob berar ekan, bosh vazir har qanday holatda ham mamlakatning ehtimoliy hujumga qarshi turish qobiliyatini ta’minlash, hujum bo‘lmasligiga umid qilishdan ko‘ra oqilonaro q ekanini bildirdi.

Avgust oyining oxirida Italiya hukumati Ukrainaga yangi harbiy yordam paketini kelishib oldi. Unga NG versiyasidagi SAMP/T zenit-raketa majmualarining to‘rtta batareyasi, Aster 30 raketa-tutib qoluvchi qurilmalari va uzoq masofali radiolokasiya tizimlari kiradi.

Bundan tashqari, Ukrainaga Fransiyaning Thales kompaniyasi ishlab chiqargan oltita uzoq masofali radiolokasiya tizimi hamda Italiyaning Leonardo kompaniyasi ishlab chiqargan bitta tizim yetkazib beriladi.

Yangi paketning umumiy qiymati taxminan 3 milliard yevro deb baholanmoqda. Uni moliyalashtirish Yevropa kredit dasturlari, xususan, Ukraine Support Loan dasturi hisobidan amalga oshirilishi rejalashtirilgan.