Meksikaning Sakatekas shtatida avtobusning yuk mashinasi bilan to‘qnashishi oqibatida kamida 24 kishi halok bo‘lgani va yana besh kishining jarohatlangani haqida shtat gubernatori Devid Monreal ma’lum qildi.
“Bugun ertalab Sakatekas-Aguaskalentes avtomagistralida sodir bo‘lgan YTHdan chuqur qayg‘udaman. Afsuski, 24 kishi halok bo‘ldi va 5 nafar kishi jarohatlandi. Voqea joyiga barcha xavfsizlik va favqulodda xizmatlar safarbar qilingan”, deb yozdi Monreal X ijtimoiy tarmog‘idagi sahifasida.
Mahalliy OAV ma’lumotlariga ko‘ra, YTH Sakatekas-Aguaskalentes trassasida sodir bo‘lgan. Yo‘lovchi avtobusi yuk mashinasi bilan to‘qnashib ketib jarga qulagan. Qurbonlar va jabrlanganlarning shaxsi haqida ma’lumot berilmagan.
