Mbappe: «Real» — dunyoning eng yaxshi klubi, ammo «PSJ»...»

Madridning «Real» klubi hujumchisi Kilian Mbappe sobiq jamoasi — «PSJ» bilan «Real» o‘rtasidagi farq haqida gapirdi.

«Bu ikki klub juda farqli tarix va madaniyatga ega. «PSJ» — nisbatan yosh klub, «Real» esa uzoq yillik tarix va chuqur an’anaga ega jamoa. Madaniyat ham boshqacha. Shubhasiz, «Real» — dunyodagi eng yaxshi klub, ammo «PSJ» ham eng kuchlilar qatorida. Ular futbolga ikki xil yondashuvni ifoda qiladi. Men «PSJ»ning bir qismi bo‘lganimdan faxrlanaman va «Real» safida bo‘lishimdan ham faxrlanaman», — dedi Mbappe.

Eslatib o‘tamiz, fransiyalik hujumchi 2017-2024 yillar oralig‘ida «PSJ» safida to‘p surgan va klub tarixidagi eng yaxshi to‘purarga aylangan. U 308 ta o‘yinda 256 ta gol urgan.

«Real» safida esa Mbappe 2024 yilning yozidan beri o‘ynamoqda va shu paytgacha barcha musobaqalarda 72 ta o‘yinda 60 ta gol kiritgan.