"Maxachev Dog‘istondagi fermasiga qaytib qo‘yini boqishi mumkin"

Agar Islam to‘rt haftadan keyin Jek Della Maddalenaga qarshi chempionlik jangida mag‘lubiyatga uchrasa, Topuriya Maxachev bilan jang qilish niyatidan voz kechadi.

Bu haqda ispaniya-gruziyalik jangchi Tbilisidagi matbuot anjumanida ma’lum qildi.

"Agar Islam yutqazsa, Dog‘istonga qaytib, o‘z fermasida qo‘y boqishi mumkin. Mabodo u g‘alaba qozonsa, men vaznimni oshiraman, bu yuz foizga aniq!", - dedi "El Matador" jurnalistning tegishli savoliga javob berar ekan.

Shuningdek, Topuriya, agar Maxachev g‘alaba qozonsa, kelasi yilning iyun oyida Oq uyda o‘tkaziladigan AQSh Mustaqilligiga bag‘ishlangan turnirda u bilan uchrashmoqchi ekanligini ham aytdi.

Ma’lumotlarga ko‘ra, yengil vazn toifasida chempionlik unvoniga ega bo‘lgan Iliya Topuriya kelasi yilning yanvar oyida Los-Anjelesda bo‘lib o‘tadigan UFC 324 turnirida oktagonga qaytadi.

Islam Maxachev va Jek Della Maddalena esa 15 noyabr kuni Nyu-Yorkda bo‘lib o‘tadigan raqamlangan oqshomda o‘zaro to‘qnash keladi.