Mask AQShni Starlink sun’iy yo‘ldoshlari orqali to‘g‘ridan-to‘g‘ri mobil aloqa bilan ta’minlamoqchi

Ilon Maskning SpaceX kompaniyasi AQSh mobil aloqa bozoriga kirishni rejalashtirmoqda. Kompaniya mamlakatning butun hududini qamrab olish imkonini beradigan radio chastotalarni sotib olish bo‘yicha kelishuvga erishgan.

SpaceX ma’lum qilishicha, Starlink Mobile xizmati orqali oddiy smartfonlar mobil aloqa minoralarisiz, to‘g‘ridan-to‘g‘ri sun’iy yo‘ldoshlarga ulanishi mumkin.

Kompaniyaning ta’kidlashicha, signal binolar devorlaridan ham o‘tib, xona ichida barqaror aloqani ta’minlash imkoniga ega bo‘ladi.

Agar reja to‘liq amalga oshsa, bu mobil aloqa qamrovini kengaytirish, ayniqsa, an’anaviy aloqa infratuzilmasi yetib bormagan hududlarda telefondan foydalanish imkoniyatlarini oshirishga xizmat qilishi mumkin.