Marin Le Pen sudning uning saylovlarda ishtirok etishini taqiqlash haqidagi hukmini "siyosiy qaror" deb atadi

Fransiyaning o‘ta o‘ng “Milliy birlashuv” partiyasi yetakchisi va ushbu partiyaning yana sakkiz nafar a’zosi Yevroparlament deputatlariga ajratilgan mablag‘larni soxta yordamchilarni yollash orqali suiiste’mol qilganlikda aybdor deb topildi.

Parij sudi qaroriga ko‘ra, Le Pen to‘rt yil ozodlikdan mahrum etildi, shundan ikki yili shartli, yana ikki yili davomida u elektron bilaguzuk taqishga majbur bo‘ladi. Bundan tashqari, unga besh yil davomida saylovlarda ishtirok etish taqiqlandi.

Hukm chiqarilgandan so‘ng, Marin Le Pen TF1 telekanaliga bergan intervyusida o‘zini "aybsiz" deb hisoblashini aytib, 2027 yilgi prezidentlik saylovida qatnashish taqiqini o‘zining prezidentlikka nomzod bo‘lishiga to‘sqinlik qilishga qaratilgan "siyosiy qaror" deb atadi.

"Meni saylovdan chetlashtirishdi, lekin aslida millionlab fransuzlar o‘z nomzodidan mahrum bo‘ldi", — deya ta’kidladi Le Pen intervyusida va hukm ustidan "imkon qadar tezroq" apellyasiya shikoyati berishini va’da qildi.