MAGATE obro‘siga jiddiy putur yetdi

Eron yadroviy ob’ektlariga berilgan misli ko‘rilmagan zarbalardan so‘ng MAGATE obro‘siga jiddiy putur yetdi. Bu haqda Rossiya prezidenti matbuot kotibi Dmitriy Peskov jurnalistlarga ma’lum qildi, deb yozmoqda RIA Novosti.

Peskov Eronning MAGATE bilan hamkorlikni to‘xtatish qarori respublikaning yadroviy ob’ektlariga asossiz tajovuz va zarbalar natijasi ekanligini ta’kidladi.

"Albatta, aytaylik, bu vaziyatda MAGATEning obro‘siga jiddiy putur yetdi", — dedi u jurnalistlarga.

Eslatib o‘tamiz, avvalroq Eron parlamenti Tehronning MAGATE bilan hamkorligini to‘xtatish to‘g‘risidagi qonun loyihasini ma’qulladi. Parlament qaroriga ko‘ra, agar yadroviy ob’ektlar xavfsizligi va yadroviy sohada tinch faoliyat ta’minlanmasa, agentlik xodimlari tekshiruvlar uchun mamlakatga tashrif buyurishi mumkin emas, bu esa o‘z navbatida, Eron Milliy xavfsizlik oliy kengashining roziligiga bog‘liq.

Dushanba kuni MAGATE bosh direktori Rafael Grossi tashkilot xodimlarining Erondagi tekshiruvlarini imkon qadar tezroq qayta boshlashga chaqirdi. Uning so‘zlariga ko‘ra, bu AQSh tomonidan hujumga uchragan ob’ektdan olib chiqib ketilishi mumkin bo‘lgan 60 foizgacha boyitilgan uran bilan nima qilishni tushunishga yordam beradi.