Leningrad viloyatining Kirishi shahridagi neftni qayta ishlash zavodiga hujum qilindi

Viloyat gubernatori Aleksandr Drozdenkoning so‘zlariga ko‘ra, kechasi Leningrad viloyatida 18 ta dron urib tushirilgan.

"Kirishidagi sanoat zonasida yong‘in qayd etildi. Favqulodda vaziyatlar vazirligi va LENOBLPOJSPAS mutaxassislari uni bartaraf etishga kirishdilar", — deb yozadi hukumat mulozimlardan biri.

Hujum fonida Pulkovo aeroporti ishini chekladi, kamida 17 ta aviareys kechiktirildi.

Kirishi shahrida Rossiyadagi eng yirik neftni qayta ishlash zavodlaridan biri — "Kirishinefteorgsintez" (KINEF) joylashgan. U avvalroq ham bir necha bor dron hujumlariga uchragan edi, 2025 yil sentyabrida esa, ommaviy axborot vositalari ma’lumotlariga ko‘ra, dronlar zavod quvvatlarining qariyb 40 foiziga zarar yetkazishga muvaffaq bo‘lgan.