Rossiyada Putinni qo‘riqlash choralari kuchaytirildi: sabab ma’lum

Kreml Rossiya prezidenti Vladimir Putin atrofida shaxsiy xavfsizlik choralarini sezilarli darajada kuchaytirdi, uning eng yaqin sheriklarining uylariga kuzatuv tizimlarini o‘rnatdi.

CNN va Financial Times nashrlarining xabar berishicha, bu qadamlar yuqori martabali Rossiya harbiy amaldorlariga qilingan bir qator suiqasdlar va to‘ntarish ehtimoli haqidagi xavotirlar fonida yangi choralarning bir qismidir.

Hujjatga ko‘ra, prezident bilan ishlaydigan oshpazlar, tansoqchilar va fotosuratchilarga jamoat transportidan foydalanish taqiqlangan. Mehmonlar ikki marta tekshiruvdan o‘tkaziladi va uning yaqin doirasi a’zolariga faqat internetga ulanmagan telefonlardan foydalanishga ruxsat beriladi.

Ushbu choralarning ba’zilari so‘nggi oylarda Rossiya Qurolli Kuchlari Bosh shtabining operasion tayyorgarlik bo‘limi boshlig‘i general-leytenant Fanil Sarvarovning o‘ldirilishi ortidan joriy etildi, bu Rossiya xavfsizlik xizmatlarining yuqori lavozimlarida mojaroga sabab bo‘ldi. Bu Kreml ichidagi iqtisodiy qiyinchiliklar, norozilik belgilari va Ukrainadagi jang maydonidagi muvaffaqiyatsizliklar fonida tobora kuchayib borayotgan keskinlikni ta’kidlaydi.

Rossiya xavfsizlik xizmatlari Putin muntazam ravishda tashrif buyuradigan joylar sonini kamaytirdi. U va uning oilasi Moskva viloyati va Valdaydagi odatiy turar joylariga tashrif buyurishni to‘xtatdilar. Putin 2025 yilda muntazam ravishda tashrif buyurganiga qaramay, bu yil hali harbiy ob’ektlarga bormadi va Kreml uning oldindan yozib olingan lavhalarini nashr etmoqda.

2022 yilda Ukrainaga bostirib kirganidan beri Putin ko‘pincha Krasnodar o‘lkasida joylashgan modernizasiya qilingan bunkerlarda haftalab vaqt o‘tkazmoqda.