Keniya va Rossiya o‘rtasida Ukrainadagi urushga keniyalik fuqarolarni jalb qilish bilan bog‘liq yuzaga kelgan keskinlik o‘zaro kelishuv bilan yakunlandi. 16 mart kuni Moskvada Keniya tashqi ishlar vaziri Musaliya Mudavadi va Rossiya TIV rahbari Sergey Lavrov o‘rtasida bo‘lib o‘tgan uchrashuvda ushbu masalaga nuqta qo‘yildi.
Muzokaralar davomida Mudavadi Keniya fuqarolarini Rossiya armiyasiga majburan yoki aldov yo‘li bilan jalb qilish amaliyoti to‘xtatilishini ma’lum qildi. Ma’lum bo‘lishicha, mingga yaqin keniyalikka dastlab fuqarolik sohasida yuqori maoshli ish va’da qilingan, biroq ular Rossiyaga kelgach, o‘z xohishiga qarshi tarzda harbiy harakatlarga safarbar etilgan.
Hozirda aldov qurboni bo‘lgan ushbu fuqarolarni vataniga qaytarish bo‘yicha maxsus reja ustida ish olib borilmoqda.
Fevral oyida Keniya parlamentiga taqdim etilgan razvedka hisoboti mamlakatda katta shov-shuvga sabab bo‘lgan edi. Unda Rossiya tomonida jang qilayotgan keniyaliklar soni rasmiylar taxmin qilganidan besh baravar ko‘p ekani (1000 nafarga yaqin) qayd etilgan.
Keniya tashqi ishlar vaziri o‘rinbosari Abraham Korir SingOei o‘z fuqarolaridan "zambarak o‘qi" sifatida foydalanilishini keskin qoralab, buni qabul qilib bo‘lmas holat deb atagan edi.
Sergey Lavrov muzokaralar yakunida keniyaliklar endilikda "maxsus operasiya"ga jalb etilmasligiga rozilik berdi. Rossiya tomoni harbiylar safidagi keniyaliklar u yerga ixtiyoriy ravishda qo‘shilganini da’vo qilsa-da, yangi cheklov choralarini qo‘llab-quvvatlashini bildirdi.
"Keniya va Rossiya o‘rtasidagi munosabatlar ushbu mavzudan ancha kengroq va boshqa sohalardagi hamkorlikka putur yetmasligi lozim", — deya ta’kidladi Lavrov.
BMTda uyat va bema’nilik teatri
Eron Isroilga o‘ta og‘ir ballistik raketalar bilan kuchli hujum uyushtirdi
Tramp dunyo davlatlaridan yordam so‘radi
