Kamchatkadagi zilzila sababli Yaponiyada sunami xavfi e’lon qilindi

Kamchatkada sodir bo‘lgan kuchli zilziladan so‘ng Yaponiyaning butun Tinch okeani sohillarida sunami xavfi e’lon qilindi.

Yaponiya Milliy meteorologiya boshqarmasi ma’lumotlariga ko‘ra, sunami to‘lqinlarining balandligi 1 metrga yetishi mumkin, ular mahalliy vaqt bilan soat 10:00-11:00 atrofida Yaponiya qirg‘oqlariga yetib boradi. Mahalliy aholini qirg‘oq chizig‘iga yaqinlashmaslikka chaqirishgan.

Yaponiyalik seysmologlarning ma’lumotlariga ko‘ra, Kamchatkada sodir bo‘lgan zilzila kuchi 8 ballni tashkil etgan. Shu bilan birga, Yaponiyaning o‘zida ham yer silkinishi sezilmagan.