AQSh sobiq vise-prezidenti Kamala Xarris kelgusida prezidentlikka nomzodini qayta ilgari surish ehtimolini rad etmadi. BBC nashriga bergan intervyusida u siyosatdan butunlay chetlanish niyatida emasligini, jamoat xizmatini o‘z hayotining ajralmas qismi deb bilishini ta’kidladi.
“Men butun faoliyatimni odamlarga xizmat qilishga bag‘ishlaganman. Bu mening tabiatimda bor va bundan voz kecha olmayman”, — dedi u.
Xarrisdan “Oq uyni boshqaradigan birinchi ayol bo‘lishingiz mumkinmi?” deb so‘ralganida, siyosatchi “Ehtimol, ha”, deya javob qaytardi. Shu bilan birga, u hozircha prezidentlik saylovida ishtirok etish bo‘yicha yakuniy qaror qabul qilmaganini bildirdi.
AQShda navbatdagi prezidentlik saylovi 2028 yilda o‘tkaziladi. Xarris o‘zining keyingi siyosiy qadamlari haqida hali yakuniy fikrga kelmaganini, biroq mamlakat ravnaqi yo‘lida faol bo‘lish niyatida ekanini qayd etdi.
Shuningdek, u Demokratik partiyada o‘z nomzodi “kuchsiz” deb baholanishi haqidagi fikrlarga javoban, “Men so‘rov natijasiga emas, ishonch va harakatga tayanganman”, deya bildirdi.
Intervyu davomida Kamala Xarris amaldagi prezident Donald Tramp faoliyatini ham tanqid qilib, uni davlat institutlaridan shaxsiy manfaatlar yo‘lida foydalanayotganlikda aybladi.
So‘nggi saylovda Xarris 48,43 foiz ovoz to‘plagan, biroq Tramp ustunlikni qo‘lga kiritgandi. Siyosiy tahlilchilarga ko‘ra, Xarrisning so‘nggi bayonoti uning 2028 yilgi saylovlarga tayyorgarlik jarayonini boshlab yuborganidan darak beradi.
AQShning Toshkentda tug‘ilgan mulozimi O‘zbekistonga kelyapti
Toshkentda bo‘lajak kuyov qizni aldab, hovlisini sotib yuborgani yuzasidan rasmiy ma’lumot berildi
"Vaqt Isroilga qarshi ishlayapti..."
