Kaliforniyada noyob oltin tanga 1,44 million dollarga sotildi

Qo‘shaloq burgut nomi bilan mashhur bo‘lgan 20 dollarlik noyob oltin tanga Janubiy Kaliforniyadagi auksionda 1,44 million dollarga sotildi.

Associated Press (AP) agentligi xabar berishicha, Stack's Bowers Galleries auksion uyi ekspertlarining fikricha, 1870 yilda Karson-Siti shahrida (Nevada shtati) zarb qilingan tanga asl 3789 nusxaning saqlanib qolgan 40-50 nusxasidan biridir.

Bernard Richards kolleksiyasidagi tanga xaridori anonim qolishni afzal ko‘rdi. Professional Coin Grading Service ma’lumotlariga ko‘ra, o‘z turidagi eng yaxshisi hisoblangan tanganing narxi kutilgan 2 million dollarlik chegaradan oshmadi.

Numizmatika bo‘yicha mutaxassis Jon Kralevichning so‘zlariga ko‘ra, COVID-19 pandemiyasi davrida kolleksiya tangalariga qiziqish sezilarli darajada oshdi. Uning qo‘shimcha qilishicha, tanga taxminan 30 yillik noaniqlikdan so‘ng "soyadan chiqib ketgan" va kollektorlar orasida shov-shuvga sabab bo‘lgan.

Agentlikning eslatishicha, tanga oxirgi marta 1986 yilda atigi 23 100 dollarga sotilgan. Uning qiymati oltin ekvivalentidan sezilarli darajada yuqori: bir unsiyadan kamroq oltin bor-yo‘g‘i 2600 dollar turadi.

E’tibor bering, 20 dollarlik tanga "Qo‘shaloq burgut" (Double Eagle) deb nomlangan, chunki chiqarilishidan oldin Qo‘shma Shtatlardagi eng katta oltin pul birligi "Burgut" deb nomlangan 10 dollarlik tanga edi. 2021 yilning iyun oyida Nyu-Yorkdagi Sotheby'sda 1933 yilgi tanga rekord darajadagi 18,9 million dollarga sotildi.