JSST: Demensiya kasalligi keksalarda kelib chiqayotgan nogironlikning asosiy sabablaridan biriga aylanmoqda

📊 Jahon sog‘liqni saqlash tashkiloti demensiya kasalligi bo‘yicha yangi hisobotini e’lon qildi. Unda qayd etilishicha, dunyoda ushbu xastalikdan aziyat chekayotgan 57 million kishi yashaydi.

📈 Har yili qariyb 10 million nafar odamda mazkur patologiya anqlanmoqda. Bemorlarning salkam 60 foizi past va o‘rta daromadli mamlakatlarda istiqomat qiluvchi aholi vakillaridir.

🔎 Asosan keksa yoshli odamlarda kuzatiladigan ushbu kasallik aqliy qobiliyat va xotiraning susayishi bilan namoyon bo‘ladi.

🩺 Bunga miya qon tomirlari aterosklerozi, insult, qandli diabet, takroriy bosh miya jarohatlari, spirtli ichimliklar, giyohvandlik, doimiy qon yo‘qotish, depressiya, ortiqcha vazn yoki semizlik kabi omillar sabab bo‘lishi mumkin.

📌 Demensiya hozir sayyoramiz bo‘yicha yuz berayotgan o‘lim holatlarining eng ko‘p uchrovchi yettinchi sababidir. Qolaversa, u keksa yoshdagi odamlarda kelib chiqayotgan nogironlikning asosiy omillaridan biri hisoblanadi.

🟣 Tahlillarga ko‘ra, Alsgeymer kasalligi — demensiyaning eng keng tarqalgan shakli bo‘lib, taxminan 60-70 foizni tashkil qiladi.

➡️ Shundan kelib chiqqan holda, JSST tomonidan demensiya bo‘yicha yettita strategik yo‘nalishni o‘z ichiga olgan Global harakatlar rejasi amalga oshirilmoqda.

‼️ Mutaxassislar “bu kasallikning oldini olishga qaratilgan sa’y-harakatlarni kuchaytirish juda muhim” degan xulosada. Chunki ushbu xastalikka chalinganlarning umumiy soni 2030 yilda 82 million, 2050 yilga borib esa 152 million nafarga yetishi prognoz qilinmoqda.