Italiyalik jurnalist Yevropa komissiyasi brifingida G‘azoga oid savol berganidan keyin ishdan bo‘shatildi

Italiyaning Nova axborot agentligi muxbiri Gabriele Nunsiati Yevropa Komissiyasi rasmiylariga G‘azo haqida savol berganidan so‘ng ishdan bo‘shatildi.

Yaqinda Bryusselga tayinlangan jurnalist 13 oktyabr kuni bo‘lib o‘tgan matbuot anjumani chog‘ida Yevrokomissiya rasmiylaridan urushdan keyingi qayta qurish uchun tovon to‘lash tamoyillari haqida so‘radi. Uning eslatishicha, YEI bir necha bor Rossiya Ukrainaga yetkazilgan zararni to‘lashi zarurligini ta’kidlagan va bu yondashuv Isroilga ham tegishlimi yoki yo‘qmi, deb so‘ragan.

Komissiya matbuot kotibi Paola Pigno bu borada izoh berishdan bosh tortdi.

Voqeadan bir necha kun o‘tib, Yevroparlamentning Italiyaning chap qanoti vakili Gaetano Pedulla Nunsiati ishdan bo‘shatilganini e’lon qildi.

Jurnalistning o‘zi bu ma’lumotni Anadolu agentligiga tasdiqlab, voqea tafsilotlarini oshkor eta olmasligini ta’kidladi.

Ursula fon der Lyayen boshchiligidagi Yevropa komissiyasi Isroilni qo‘llab-quvvatlagani va Isroilning G‘azo sektoridagi harakatlarini so‘zsiz ma’qullagani uchun bir necha bor tanqid qilingan.