Italiya bosh vaziri: Yevropa Putin bilan muzokaralarni boshlashi kerak

Italiya bosh vaziri Jorja Meloni Ukrainadagi urushni to‘xtatishga qaratilgan xalqaro sa’y-harakatlar fonida Yevropa bilan Rossiya o‘rtasida muzokaralar olib borish g‘oyasini qo‘llab-quvvatladi. U Rimda o‘tkazilgan yillik matbuot anjumanida shunday dedi:

«Menimcha, endilikda Yevropaning ham Rossiya bilan gaplashish vaqti keldi. Chunki agar Yevropa muzokaralarning ushbu bosqichida ishtirok etishga qaror qilsa-yu, biroq mojaroning faqat bir tomoni bilangina muloqot qilsa, u holda Yevropa qo‘shishi mumkin bo‘lgan ijobiy hissa oxir-oqibat cheklangan bo‘lib qolishidan xavotirdaman».

Avvalroq Fransiya prezidenti Emmanyuel Makron ham Kreml bilan muloqot qilishga tayyor ekanini, xususan, yaqin haftalarda Vladimir Putin bilan telefon orqali gaplashish niyati borligini bildirgan edi.