"Istaganingizni qiling": Eron muzokara qilishdan bosh tortmoqda

Eron prezidenti Masud Pezeshkian Vashington bilan muzokaralar o‘tkazish imkoniyatini qat’iyan rad etib, uning mamlakati bosim ostida muloqotga kirishmasligini aytdi.

Avvalroq Eron oliy rahnamosi Oyatulloh Ali Xomanaiy ham Tehron bosimga bo‘ysunmasligini ta’kidlagan edi. Uning bayonoti AQSh prezidenti Donald Tramp yangi yadroviy kelishuv bo‘yicha muzokaralarni qayta boshlash taklifi bilan maktub jo‘natganini e’lon qilganidan keyin yangradi.

Tramp kelishuvga ochiqligini bildirar ekan, u Eronni iqtisodiy jihatdan yakkalab qo‘yish va neft eksportini qisqartirishga qaratilgan qattiq sanksiyalarni joriy qilib, “maksimal bosim” kampaniyasini davom ettirdi. Fox Business nashriga bergan intervyusida u Eronning ikki yo‘li borligini aytdi: yo harbiy yo‘l, yoki yadroviy qurol yaratishga to‘sqinlik qiladigan kelishuv.

Tehron yadroviy qurol yaratish istagini bir necha bor rad etgan, biroq MAGATE Eron yaqinda uranni boyitishni 60 foizga tezlashtirganini, ya’ni qurol darajasiga yaqinroq bo‘lganini aytadi.