Isroildagi yangi qonun faqat falastinliklarga nisbatan qo‘llaniladi

Isroilda qabul qilingan terrorchilarga o‘lim jazosini qo‘llash to‘g‘risidagi qonun amalda faqat falastinliklarga nisbatan qo‘llanilishi mumkin, deb xabar bermoqda Deutsche Welle

Xabar berilishicha, Knesset (Isroil parlamenti) mamlakat Jinoyat kodeksiga o‘lim jazosi qo‘llanilishi doirasini kengaytirishga oid o‘zgartirishlarni tasdiqlagan. Yangi qoidalarga asosan, Isroil fuqarolari orasida qurbonlarga sabab bo‘lgan teraktlarni sodir etgan shaxslar uchun osish orqali o‘lim jazosi berilishi joriy qilinadi.

Huquq himoyachilari va muxolifat vakillari mazkur qonunni “irqchilikka asoslangan” deb atab, u faqat falastinliklarga qarshi qo‘llanilishini ta’kidlashmoqda. Gap shundaki, endilikda Falastin hududi hisoblanuvchi Iordan daryosining G‘arbiy sohili aholisi ishlarini ko‘rib chiquvchi Isroil harbiy sudlari terrorizmda ayblangan falastinliklarga nisbatan faqat o‘lim hukmini chiqarishi mumkin. Ammo agar sudlar xuddi shunday jinoyat uchun Isroil fuqarolarini sud qilsa, qatl etish yoki umrbod qamoq jazosi berish o‘rtasida tanlov qilish imkoniyatiga ega bo‘ladi.