Isroil prezidentining orzusi nima?

Isroil prezidenti Isxak Gersog Saudiya Arabistoni bilan tinchlikni nishonlashni orzu qiladi.

Bu haqda u Amerikaning Newsweek jurnaliga bergan intervyusida aytib o‘tdi.

"Mening orzum, masalan, Saudiya Arabistoni valiahd shahzodasi Muhammad bin Salmon Ol Saud bilan tinchlikni nishonlash", dedi yahudiy davlati prezidenti.

U “Islom va tavhid beshigi va yahudiylikning beshigi birgalikda dunyoni o‘zgartirishi mumkin”, deb baholadi. Isroil prezidenti Ar-Riyod bilan tinchlik o‘rnatish shaxsan o‘zi uchun ham, butun mintaqa uchun ham “muhim voqea” bo‘lishini qo‘shimcha qildi. Rahbar, shuningdek, “Yaqin Sharqning kelajagi yahudiylar va musulmonlar o‘rtasidagi muloqotda” ekanini ta’kidladi.

Valiahd shahzoda 18 noyabr kuni Oq uyda AQSh prezidenti Donald Tramp bilan uchrashuvi chog‘ida Isroil bilan munosabatlarni normallashtirishni boshlash uchun Ar-Riyodga Falastin davlatini yaratish bo‘yicha “qaytib bo‘lmaydigan, ishonchli va vaqt chegaralangan yo‘l” zarurligini ta’kidladi.

2020 yil sentyabrida Isroil AQSh vositachiligida BAA va Bahrayn bilan normallashtirish kelishuviga qo‘shildi. Uch tomonlama bitim "Ibrohim kelishuvi" nomi bilan mashhur edi. Keyinroq Marokash va Sudan yahudiy davlati bilan munosabatlar normallashganini e’lon qildi. Bu kelishuvlarga qadar Isroil arab davlatlari orasida faqat Misr va Iordaniya bilan diplomatik aloqalar o‘rnatgan edi.