Isroil armiyasi Iordan daryosining g‘arbiy qirg‘og‘iga havodan zarba berib, uch kishini o‘ldirdi

Isroil harbiy-havo kuchlari Iordan daryosining g‘arbiy qirg‘og‘idagi Jenin shahri yaqinida noyob havo hujumini amalga oshirdi. Isroil tomoni ushbu zarba oqibatida «Hamas» harakatining faoli Qais Bitaui hamda uning ikki nafar sherigi yo‘q qilinganini ma’lum qildi. Biroq «Falastin islomiy jihodi» qurolli qanoti bayonot berib, halok bo‘lganlar ularning jangchilari ekanini va Bitaui tashkilotning G‘arbiy qirg‘oqdagi eng ko‘zga ko‘ringan yetakchilaridan biri bo‘lganini bildirdi.

Ushbu amaliyot Isroil armiyasi tomonidan G‘arbiy qirg‘oq shimolidagi qochqinlar lagerlarida falastinlik qurolli guruhlarga qarshi olib borilayotgan yirik «Temir devor» harbiy kampaniyasi doirasida sodir etildi. BMT ma’lumotlariga ko‘ra, mazkur yirik harbiy harakatlar tufayli lagerlardan qariyb 40 ming nafar aholi o‘z uylarini tashlab chiqishga majbur bo‘lgan. «Hamas» harakati Jenindagi ushbu hujumni «bosqinchi kuchlar tomonidan amalga oshirilgan qirg‘in» deb qoraladi va bunga nisbatan qarshilik yanada kuchayishini ma’lum qildi.