Abduqodir Husanov Belarusda ham, «Lans»da ham, O‘zbekiston terma jamoasidayam uch markaziy himoyachili sxemada muvaffaqiyat qozongan. Shu jihatdan olsak, go‘yo «Manchester Siti»da adaptasiya qiyinroq bo‘lishi kerakdek.
Lekin shu bilan birga Gvardiolaning so‘nggi ikki yildagi sxemasi odatiy 4 himoyachili strukturalardan farq qilishiga ham ahamiyat berish kerak. «Siti» «Liverpul» yoki «Real» kabi ikki markaz va qanotlarda an’anaviy fulbeklar bilan o‘ynamayapti. Biroz murakkabroq.
Pep Gvardiola shogirdlari qog‘ozda 4-3-3 bo‘lsa ham joylashuvda biroz farq qiladi. Aldamchi fulbeklar degan pozisiyani ham aynan Gvardiola keng qo‘llay boshlagan.
To‘p bilan ikki xil rotasiya bor: 1) qanotdagi Riko Lyuis yoki markazdagi Akanji markazdagi tayanch yarimhimoyachidan biriga aylanadi. 2) Yoshko Gvardiol qanotda ancha oldinga chiqib, himoyada yana uchlik paydo bo‘ladi.
Shuning uchun Gvardiola odatda himoyada uchta, hatto ba’zida to‘rtta markaziy himoyachi profilidagi futbolchilardan foydalanishni odat qilgan. Diash, Uoker, Akanji, Ake, Gvardiol - nomzod ko‘p bo‘lsa-da, Husanov debyuti ko‘p kuttirmasa kerak. Shuningdek, Uoker, Ake va Stounzlar yoshi ancha o‘tdi, klub ularni sotish haqida ham o‘ylay boshlagan.
Transferga Pepning o‘zi rozilik bergani va yaxshi pul sarflaganidan kelib chiqsak, Husanov profil jihatidan aynan kerakli futbolchi sifatida baholangan. Orif Tolipov kanalida chiqargan taqqoslama jadvaliga qarasangiz ham, Husanov ustunlik va kamchiliklar borasida «Siti»dagi boshqa himoyachilardan mutlaqo farqli profil. Ba’zi ko‘rsatkichlarda ikki barobar kattaroq natija ko‘rsatgan. To‘g‘ri, «Siti» va «Lans» o‘yin uslubidagi farq ham muhim, ammo biz tanigan Husanov «Manchester Siti» himoyasidagi muvozanatga ijobiy ta’sir qilsa kerak. Ayniqsa, qarshi hujumlardan «Siti» juda ko‘p xavfli zarbalar o‘tkazyapti, bu borada (qarshi hujumlar soniga nisbatan o‘tkazilgan zarbalar o‘rtacha xavfi) APLda 19-o‘ringa tushib ketdi ham. Ayni damda Husanov aynan shu uchun kerak.
Gvardiola ancha yosh futbolchini olayotganiga qarasak ham, u Husanovda nimadir ko‘ra olgan va o‘z g‘oyalarini singdirish uchun mos bosqichda. Tabiiyki, bu hamyurtimizning o‘sishiga turtki bo‘ladi.
Nimalar deyapmiz-e, Pep Gvardiola, «Manchester Siti», APL, Abduqodir Husanov... Hali voqeaning bor mohiyatini to‘liq anglab yetmadik, ishonavering.
Qahramon Aslanov.
«Real», «Yuventus», «Bayer», «Borussiya» Husanovga qiziqmoqda. «Man Siti» esa futbolchining otasi Hikmat Hoshimov bilan uchrashdi
Neymar: «Ronalduning fikriga qo‘shilaman»
Husanov «Manchester Siti»ga o‘tsa, «Bunyodkor» va «Energetik-BGU» transferdan qancha mablag‘ ishlab olishi ma’lum bo‘ldi
