Hindistonlik sportchi qiz "100 gramm" tufayli Olimpiadadan chetlatildi. U finalga chiqqandi

Hindistonlik ayol kurashchi Vinesh Phogat 2024 yilgi Parij Olimpiadasida 50 kilogrammgacha bo‘lgan erkin kurash musobaqasidan diskvalifikasiya qilinganidan bir necha daqiqa o‘tib kasalxonaga yotqizildi.

Seshanba kuni Olimpiada finaliga chiqqan birinchi ayol kurashchi bo‘lib tarixga kirgan 29 yoshli sportchi suvsizlanish tufayli yiqilib tushdi.

Chorshanba oqshomida Phogat finalda amerikalik Sara Xilderbrandtga qarshi o‘ynashi kerak edi. Ammo 50 kg vazn toifasida finalga chiqa olmadi, chunki u 100 gramm ortiqcha vaznga ega edi va natijada diskvalifikasiya qilindi. Bu shuni anglatadiki, Vinesh o‘zining ilk Olimpiya medali uchun kurashish imkoniyatiga ega bo‘lmaydi.

Erkin kurash bo‘yicha ayollar o‘rtasidagi 50 kilogramm vazn toifasida Vinesh Phogat barcha qarshiliklarga qaramay finalga chiqdi. Biroq, seshanba oqshomida final yo‘llanmasini qo‘lga kiritgan kuni 2 kilogrammga yaqin ortiqcha vaznga ega edi.

OAV ma’lumotlariga ko‘ra, 29 yoshli Phogat tun bo‘yi yugurish, arqonda sakrash va velosport kabi kuchli sport turlari bilan shug‘ullanib, vazn yo‘qotish uchun harakat qilgan. Ammo 7 avgust kuni ertalab 50 kg 100 gramm vazn bosdi.

Xalqaro kurash qoidalarining 11-moddasiga ko‘ra, Vineshning o‘rniga yarim finalda unga yutqazgan kurashchi tushadi va shuning uchun Gusman Lopes Yusneylis finalda Xilderbrandtga raqib bo‘ladi.